شـعــــر
---------
و بستـغـفـــر
-----------------
شعر / محمد عبد الفضيل
----------------------------
و بستـغـفـــر ...
ف عز الليل وبتاوب
كابوس النوم دا بيشخلل
وسجدة ف ديل ضمير غايب
وكبر ديكي مسمعتش
عشان تكبير مالوش نايب
ووقت الفجر مطلعتش .. مشجعتش
ركوع وسجود ذليل خايب ...
------------------- وبستـغـفـــر -------------------
وأنا راسي بتتوجع
وأنا بفطر علي مدفع
وأنا ف محنه بتتهول
وبإستغفاري بأتحول
بأكون بجناح ف ملكوته
بيعشق ذكره وسجوده
ولما الحال بيتبحبح
تملي عنه بأتنحنح
و بنسي ذكره و وبفوته ....
------------------- وبستـغـفـــر -------------------
عشان يرزقني من قوته
ويحميني بجبروته ..
ولما ضيقي بيطول
يفوتني الصبر ويهول
با كون درويش ف ملوكته
فبتلطع علي حيطه
وأهز الراس ف ميت زيطه
شوية همهمه فارغه
علي رياله وبرنطيه
علي لحمه ف طاجن فته
بقطع فيها ميت حته
كأن في بقي شوكالتيه .....
------------------- وبستـغـفـــر -------------------
عن القبله
عملانها ميتين قبله
وهيا رافضه مش قابله
وطن عصفور علي السسبان
تصيده بضربه من نبله
ومكه يا خلق ليها مكان
توحد سجدة الأوطان
فليه هنغير القبله ..
------------------- وبستـغـفـــر -------------------
عشان مملكشي غير توبه
بكررها ميتين نوبه
بسمعها لولادي كمان
لتحيا عزة الأوطان
صحيح
دي ما عد ش فيه أوطان
بتستغفر عن العيبه ...
------------------------ شبرا في 6/4/2016 ------------------------
ليست هناك تعليقات:
إرسال تعليق