( بكرة وردة )
كل واحد ..ف البلد دى
بكرة....حيحقق مراده
واللى فاتوا من ..حياته
بالأيدين.. يحصل عليه
بكرة أحلى من النهاردة
بكرة..وردة...ف البوكيه
والسما حترخ خير
والفقير ..حيبقى بيه
ويمشى يتقمع ..
ف العتبة وف شبرا
# بكرة ..وردة.. ف الزهرية
فيها ريحة الحرية
فيها شىء برىء النوايا
والنهاية..السكة خضرة
# بكرة..وردة.. ف ورق سولوفان
فيها ريحة الأمان
يدخل البيت من جديد
يقتل الخوف العنيد
واللى باين من بعيد
فترة عدت...
وأستحالة..هتبقى حاضرة
# بكرة..وردة.. ف احلى شتلة
فيها ريحة..لمة..شلة
والفراق.. مشتاق يفرق
وأحنا حنصمم ..ونجمع شملنا
وهتبقى سهرة
# بكرة..وردة.. ف قلب فازة
فيها ريحة الأجازة
أجازة م الحزن...اللى كسر ضلعنا
والفرح يطرح..حضن دافىء يضمنا
ضمة الموج الشديد..
بشوق لصخرة
# بكرة..وردة..ف قلبب..وردة..
مشبوكين بدبارة واحدة
فيهم الشوق..والحنين
والسنين..تطرح مودة
نحصد الود اللى طارح
بالأيدين..نملأ المقاطف
واللى ..شايف
واللى..عارف
شعب هيحقق..مراده
بالأرادة..وبالمذاكرة
# بكرة أحلى من النهاردة
صدقونى..بكرة..وردة
بقلم/هانى السيد
ليست هناك تعليقات:
إرسال تعليق