( جرالنا ايه )
كنا أهل و كنا عيله
بينَا عشره ياناس و جيره
كات قلوبنا الصافيه خالص
طيبه ولو بينَا ايه
أد ايه كان فيه سماحه
و كلمة الصدق بصراحه
و الحنان و أمان و راحه
روحنا و اتغيرنا ليه
كان زمان لو حد فينا
يوم تعب او غاب علينا
كان بيبقى الخوف مالينا
نجرى م الشوق اللى فينا
كلنا بنسأل عليه
مره واحده ف يوم و ليله
كل دا اتبدل بغيره
و كل واحد راح لحاله
و اللى بيقول طاب و ماله
هوَا يعنى هيحصل ايه
يجرى ايه لو حد منَا
قال هننسى القال و قلنا
و الحكايه بسيطه خالص
كلمه و نصفَى اللى بينَا
مش كفايا اللى احنا فيه
و الغريب ايه دخله فينا
و ليه نسمَع حد بينا
مهما يظهر حبه لينا
من بعيد و عنيه علينا
تفتكر مصلحته ايه
بقلم \ محمد العربى
ليست هناك تعليقات:
إرسال تعليق