( عايزة ايه ؟ )
مصر ... قولى عايزة ايه ؟
باشتريكى ... بتبعينى
رافضة دايما تسمعينى
دمعتك بتسيل فى عينى
مصر ... قولى عايزة ايه ؟؟؟
دمى ف وريدك بيجرى
ضحكتك فى الضلمة فجرى
تندهى ... لنداكى باجرى
و اللى فيكى باحس بيه
مصر ... قولى عايزة ايه ؟
فوق ترابك عشت عاشق
حبى ليكى بجد صادق
مهما بابعد او افارق
حلمى فيكى مش ناسيه
مصر ... قولى عايزة ايه ؟
تظلمينى كتير .. و اسامحك
دمى انا بينزف لجرحك
ليه بتنسينى فى فرحك
و اللى خانك تحضنيه
مصر ... قولى عايزة ايه ؟
فى الميدان كنتيلى قبلة
لما كنتى بحلمى حبلة
سيبتى ليه الحلم يبلا
و بايديكى بتخنقيه
مصر ... قولى عايزة ايه ؟
ليه بتنسى ان انتى امى
و ان دمك هو دمى
ليه ما بتشاركيش فى همى
و انت همك كلى بيه
مصر ... قولى عايزة ايه ؟
عايزة روحى ... اتفضليها
بس شرط .. تحسى بيها
تبقى بيكى و تبقى بيها
بطلى عشقى تخونيه
قولى تانى ... عايزة ايه ؟
عايزة عرقى ... مش خسارة
ما انتى عندك ميت امارة
ثورتى و مليون بشارة
و الميدان و لا نسيتيه ؟
كنت حاضن فيكى بكره
و الامانى و الف فكرة
ليه دا كله يبقى ذكرى
و انتى قادرة تحققيه ؟
ليه قفلتى الباب عليا ؟
ليه خنقتى البسمة فيا ؟
ليه بترضيلى الدنية ؟
صوتى ليه ما بتسمعيه ؟
طب قوليلى عايزة ايه ؟
علمى فيا بحنانك
و افرقينى عن اللى خانك
حضنى وحده فيه امانك
عارفة ... طب ليه تنكريه
ما تقولى لى عايزة ايه ؟
فرى من حضن الديابة
و اسكنى قلوب الغلابة
و انزلى بحر الطيابة
ميته شهد ... اشربيه
عيشى بينا و ما تخافيش
حبنا ما بينتهيش
عمره يوم ما يكون مفيش
صدقينى .. و جربيه
مدى ايدك ... شدى ايدى
و اجرى من تانى فى وريدى
خلى فرحك يبقى عيدى
و اللى ضاع منى التقيه
نفسى اشوفك لابسة طرحة
مالية كل الدنيا فرحة
تبقى شجرة بجد طارحة
طرح نفسى بتشتهيه
تحت رمشك عايز انام
و انسى خوفى و اعيش سلام
فعل مش خبة كلام
و ابقى حد بتعشقيه
شمرى كمامك و قومى
صلى بيا امام .. و صومى
كونى وسط الليل نجومى
و النهار همى و جيبيه
اوعى اشوف الخوف فى عينك
ارسمى بايدك سنينك
و اللى فكر يوم يهينك
انسى انك تعرفيه
دوسى فى طريقنا اللى باين
و اصنعى بناسك سفاين
كونى فى الصحرا مداين
و اثبتى كدب السفيه
مصر ... يا احلا ما فينا
فوقى ياللا و كونى بينا
و امسحى الجرح و داوينا
دا الامل فارد ايديه
بقلم : فهمى على
ليست هناك تعليقات:
إرسال تعليق