قصيده بعنوان
(نفسي ف وطن )
يعني ايه كلمة عروبه
يعني ايه كلمه وطن
أبني طوبه جنب طوبه
في زمن غير الزمن
في زمن ما
يكونشي فيه
حدي وحدك
نلغي فيه كلمة حدود
يبقي جدي ف الهويه
هو جدك
والزمان يدينا من تاني
الوجود
والهويه هيه هيه
ينكتب عنواني فيها
الوطن ......!!!!
والفصيله تبقي دمي
والعروبه
تيبقي امي
واسمي فبها
ابن الوطن
نفسي ازرع
الف ورده
واهديها لشهيد
اللي دمه لساه
بيجري ف الوريد
نفسي ابني الكون عمار
وامحي من كل القلوب
كلمه دمار ..نفسي اشوف
ضي النهار من غير غبار
نفسي ابني ف قلب وطني
الف ميت مليون منار
نفسي اسمع صوت
بﻻبل ..مش مدافع
او بارود .
.نفسي
امحي من السكك
كلمة حدود
نفسي اﻻقي النيل
بيجري ف الفرات
والقي بابل ساكنه
جوه اﻻهرمات
أبقي ف اﻻردن
وبيتي ف السودان
وافطر الصبح ف سوريا
وأتعشي ف عمان
وابن عمي اللي ف غزه
وابن خالي ف الجزاير
وابقي من تونس حبيبتي
ارض خضره لكل زاير
املي م العاصي واغسل
الحيطان والكعبه مكه
وف اليمن ازرع امان
واغزل الخيطان ف عكا
ابقي من لبنان
وعيلتي سعوديه
أبقي اماراتي
وجزوري مغربيه
ابقي بحريني وليبي أوكويتي
واﻻمان ساكن ف بيتي
نفسي افتح
كل بااااب مقفول
نفسي اكتب الف كلمه
بس تفهمها العقول
نفسي ابدل
كل خوف جوايا ساكن
نفسي اسكن باﻻمان
كل اﻻماكن
وامحي ليه
وازاي ولكن
من قاموسنا والزمن
نفسي اعيش كلمة وطن
سيد بدره
ليست هناك تعليقات:
إرسال تعليق