(مرحبًا سعادة الحرامى)
ولسيادتك الصف الأولانى
مافيش تابور عيش بتقفه
مينتهيش بالأمانى
ولا سفينة مغرقانى
فى بِركة عميانى
ولا بَركة فلوس مقويَّانى
ولا جنِّى فى فانوس
ولا حلم فى كابوس
ولا حتة عروس عند ابن عروس
وانت بدوس على الرقة والعفةَ
ولا دكان شحاته والهدمة
غير البرشامة والعتمة
والإنسانية فاشوش
ولا كورة ولا ناقد ولا مستكاوى
ولا زنقة ولا سكة مرحتهاش
ومافيش معاش فى البريد مجاش
ولا شوبير الحلقة مطلعهاش
ولا حركة معملهاش
ولا طلقة ولا علقة مخدهاش
ولا زفة ولا بحة
ولا دقة ولا قُفة بودنين
يشلوها اثنين
ولا لعبة ولا ثورة ولا آفة ولا حافة
ولا أفَّة ولا عريض القفا بيطلب حاجة
ولا بخة ولا لفتة عين
ولا حبة إخوان معاندين كافرين
ولا شلة خوَّان مسافرين ضالين
ولا تجار لاعبين بالدين
مفلسين بالاحترام
ولا سرقة ولا شمه ولا إكراه ولا إجرام
ولا إجبار ولا عضين ولا عزين
ولا حطين فى البال حاطين
مشرقين مغربين شرقانين بالموت
والسكة وجمهورية زفتى وشبين بالكوم
بتستنى تعاكسه وتسبل له
وبالانسجام الأهلى بيجيب جون
والزمالك بيزوم بالفِطْرة على الكوم
والقُطرة والأرانب الوالدِين
بالعشَرَة وبالعِشْرة جايين
والقَطرَة والنظرَة والحاجب
والرمش الكحيل مرسوم
وعلى الجبهة مدور ومعلوم
متقلشى شبندر التجار
وشمندر بيحفظ الأسرار
والحسد بالعين متقوَّر يعور
ومعدوم ومصدوم ومظلوم ذلك المقوار
والقنطرة والدكة والغُطرة والسُترة
والدبْكة والربكة والرقصة والسُّرة
برتقان فى الصيف بالكوم
والكومى ما بيبصر ولا الولد بيقش
والبنت بترص والشايب بيتحش
والتعبانين والعيانيين والسهرانيين
والغلابة البيبى دول لولادِك دول
ودولة المهم ما بتقعد يوم
ولا بتنعقد ولا بتتعقد المشورة يوم
ولا بتترفع الراية يوم بالشارة والدوم
والبشارة ما بدوم والراية بالعوم
لولاكِ لماتوا ولارجعوا ولا استشهدوا
ولا مادوا ولا هاجوا ولا اتعدموا ولا انعتقوا
تسلمى بزندِك وسفينتك وعافيتك
وقطيفتك وشالك وفستانك
ورصاص مسدسك وطلقاتك
ومدفعك ورشاشك والشوية دول
ورحلك ورحالك وحوارك الدافى
بجوالك ونجعك الهاوى
وبقطفتِك وثمارِك وجُمَّارِك وقهوة الصاوى
وقفطانك وجلبيتك وقميصك الغالى
وبمعدنك الأصيل يا بلدى
وبمعولك لِهُدَّامِك اهدمى قُدامِك فى جلدى
وكسرى عصيانك ويسلمولى عميانك
وخدمينك وطمعينك بينتحروا علشانك
ولا بتتهافت عليك الأغانى
أصله غاوى وبرانى وشرانى
والمجلس أيه ؟؟؟ فطيس وبيرجع تانى !!
البدلة لابسها مزيناك بالضاوى
والأوبرا داخلها ومحليَّاك يا حاوى
والسينما عابرها ومخليَّاك جذر وتقاوى
والمزاج العالى والجيب يبقى خاوى
والحبيب متقلشى حتة سكر ة بالمطاوى
ولا خالد الصاوى
اسم الله ولا مغنواتى ومطبطباتى
حديدك سالخنا
وجديدك قاهرنا
وأفلامك عارضها وعارضنا
وجزيرتك شايلها فى دمعة القاضى
وبلحمتك واجعنا وفى بطننا عجولنا
وبكلامك لافف قلوبنا ومافيش تفكير
بمواجع عيوبنا
وشُرْبنا الكيف يوماتى
مخليك فى العلالى
سُبكى بتلالى
ولما منعنا الزيف
لقينا الثورة بتنادى
مرحبا تعالَى لسعادتك الصف الأمامى
والمقعد الأوحد والكرسى القدمانى
والمطلع الأمجد الوثير
والمشهد الاخير المثير
ومن غير بشكير يطير
تكون النهاية مخاوية دايما للبداية
مخالفة للطباع ومتنجدة الستاير
ما إحنا خلاص بقينا ضباع
ومافيش ثعالب ولا ذئاب
والله يرحم الأرانب
فى المتش الخماسى
والقالب اللى تحت الراس انداس بالكراسى
وادشدش معاه صلات الرحم والفاس
ما خرمت الراس واللباس والدشداش
وربى يستر على ولاد الناس .
نور هادى
شاعر الفردوس
ليست هناك تعليقات:
إرسال تعليق